Brexit: UK Prime Minister Theresa zohchia in a sung, Labour nih thawl an timh cuahmah

European Union chuahtak nak kong ah UK Prime Minister Theresa May le EU hruaitu hnatlaknak an ngeimi cu UK Parliament ah an chuahpi tikah zohchia ngai in an sung.

MP 432 bak nih Theresa May a chuahpimi hnatlaknak an duh lo, MP 202 lawng nih an lungtlinpi. Conservative MP 100 leng nih MP Theresa May cu an kaltak, UK Parliament tuanbia ah sunghnak ngan bik a si.

A luancia 2016 ah khan UK rammi hna nih European Union chuahtak ding ah vote an thlak, nain EU chuahtak hnu in EU he zeibantuk pehtlaihnak dah ser a si lai timi cu kum 2 leng an ceih hi a si. Kum 2 leng an ceih hnu in an ngahmi hnatlaknak cu UK MP hna nih an cohlang lo.

MP hna nih Theresa May hnatlaknak an cohlan lonak aruang ai dang cio, cheukhat nih EU he pehtlaihnak tha deuh ser an duh, cheukhat nih EU he i hlat deuh an duh, cheukhat nih EU he hnatlaknak hrimhrim ser an duh lo.

Theresa May cu laklawh in a um ko cang, hnatlaknak thar ser than ding ah EU hruaitu maw a ton than hna lai or a rian dah a kaltak lawlaw hnga tiah ruah cio a si.

Atuni hi zuamcawhtu Labour Party hruaitu Jeremy Corbyn nih Theresa May a rian phuah ding biatung a dirh colh, MP tam deuh nih an lungtlinpi ahcun Theresa May hi a rian an phuah lai i prime minister thar an thim khawh lo ahcun thimnak thar tuah a si lai. BBC