China ah North Korea nungak tampi cu ‘sualpi ding sal’ caah an zuar hna

Korea Future Initiative timi kherhhlaitu phu nih China um North Korea nu an sining kherhhlainak an tuah tikah ‘sualpi ding sal’ caah misual hna nih an zuar hna timi an thei khawh.

Misual puaisa hna nih an zuarmi North Korea nu hna hi an tam ngai, thong tampi an si. Tam deuh cu ai zuarmi inn ah an chiah hna, cheukhat cu China pa pawl an nupi caah an zuar hna. Online ah dawhcah lo langhter ding an zuarmi zong an um fawn.

Hlawhhlangnu hmun ah North Korea nu pawl a cawtu tam deuh hi China ah rian a rak tuanmi South Korea rammi an si, online in dawhcah lo an thlahmi a zohtu tam deuh cu South Korea pa an si tiah Korea Future Initiative nih an phuan.

Misual puaisa hna nih an hlen hna i China ram an luh hnu ah hlawhhlang an tuanter cio hna, cheukhat cu hlawhhlang tuan ding ah North Korea ram chung bak ah tlaih a tongmi zong an um ve.

Voikhat ihpi ah $4.30 hrawng lawnglawng pek a si. Nupi tuan ding ah cun $150 hrawng an pek hna. An pasal le nih an tuk velh chih tawn hna ti a si.

Rawl zong thathi in an kan pe lo, puaisa hna zong nih an kan sualpi, saram bantuk in an kan tuah caah kan celh ti lo i kan zam tiah a luatmi cheukhat nih an chim.

China ah hin Chinnu le Kawlnu tampi zong an um ve, Kawlnu tampi cu China pa nupi tuan ding ah zuar an tong ve, a zammi zong an um len ve cang tiah theih a si. BBC