England ram chung Pathian zumtu an zor chin, Zarhpini biakinn khar khawh a si cang

Church of England nih kum 400 chung an kalpi cangmi an phunglam an thlen cang, Zarhpini ah biakinn kip pumh caan hmannak a um hrim lai timi cu a si kho ti lo, ai pummi tlawmnak ah cun biakinn khar nak nawl pek a si cang.

Church of England biakinn kip ah pastor(priest) an um cio, ai pummi an tlawm tuk zong ah pumh caan cu Zarhpini fatin hman a si. Nain, atu cu priest nih pumh caan hman awk a tha ti lo a ti ahcun Zarhpini ah biakinn an khar lai.

England ram chung khuate tampi ah cun minung nih panh ti lomi biakinn tampi a um cang, biakinn a panhmi an tlawm tuk cang caah priest pakhat nih biakinn 20 tiang hna a zohkhenh ti a si.

Priest pakhat nih biakinn tam tuk a zohkhenh tikah Zarhpini ah biakinn kip pumh caan hman ding a si kho ti lo, hi ruang ah Church of England nih phunglam thar an ser hi a si.

Church of England biakinn kip ah pumh caan hman hrimhrim ding timi phunglam cu 1603 kum ah an rak ser cangmi a si. BBC