Indonesia thimnak result an thanh hnu ah fak tak in mipi an buai, 6 an thi cang

Muslim milu tam biknak ram Indonesia ah president thimnak an tuah i result an thanh hnu in a lungtling lomi fak taktak in an buai i minung 6 an nunnak a liam cang.

Police he an i thuatnak ah minung 200 leng hliamhma an hmu. Jakarta khuachung ah mawtaw tam taktak zong mei an khangh chih, an buai ning a zual ngai. Police nih mitthli tlakternak khu in an kah ve hna.

A thimi hna hi meithal kuan in an thih a si tiah an chim. Nain, police nih meithal kuan taktak cu kan hmang bal lo, a thimi hna zeitindah an thih timi kan kherhhlai lio a si tiah an chim.

Buainak a zual deuh caah Indonesia cozah nih social media hmannak nawl zong cheukhat hmunhma ah an phih, a dik lomi thawngpang fawi tuk in an phawt zamh sual lai an ti.

Tutan Indonesia thimnak ah tulio president a tuan liomi Joko Widodo le zuam cawhtu Prabowo Subianto an i cuh, Joko nih a tei i Prabowo tanpitu an buai hi a si.

Anmah pahnih hi 2014 lio zong ah an rak i zuam cawh bal cang, Joko nih a rak tei i Prabowo a lung rak tling lo, a lungtlin lonak report a tuah nain a hlawh tling lo. Tutan zong a lungtling lo, hlennak a um a ti. BBC

prot5

prot4

prot3

prot2