Iran pawng ah tilawng pahnih bomb puah hnawh an tong, US he i siknak zual chin lai

Iran pawng rili ah thil phormi tilawng pahnih cu ruah lo piin bomb puah hnawh an tong, tilawng cu mei nih a kangh nain riantuantu hna cu him tein an chuah khawh dih manh hna.

Tilawng hi Japan tilawng le Norway tilawng an si. Tilawng pahnih ah riantuantu 44 cu Iran rili ralkap nih an khamh hna.

Tilawng a ratnak lampi ah bomb a chiahtu hi zeibantuk minung dah an si timi an fehter kho rih lo. Iran nih cun bomb puahtu kan si bak lo tiah an chim.

Nai hrawng hi US le Iran kar ah i rem lonak akarh ngai. US cozah nih Iran a lor deuh an ti caah Middle East ah US ralkap le raltuknak hriamnam an chap. Iran he an i thua te hnga maw tiah ruah cio a si.

Kan hnu thla zong ah khan UAE pawng ah thil phormi tilawng 4 bak bomb puah hnawh an rak tong, bomb puahtu fiang tein an thei lo nain ram tampi nih Iran a si lai an ti.

Tutan tilawng pahnih bomb puah hnawh an tonnak hmunhma hi vawleicung hmun kip ah datsi(oil) an kalpi nak tilawng lampi a si. Mah thawngpang a um le cangka in vawleicung datsi man 4% a kai colh. BBC