Israel Prime Minister nupi Sara taza cuainak: ‘Ka sual ko’ tiah a phuan cang

Israel Prime Minister Netanyahu a nupi Sara cu rawl caah cozah phaisa ningcang lo ngai in a hman tiah sual an puh i taza an cuai, biaceihzung ah Sara lila nih ka sual ko tiah a chim cang.

Sualnak a tuah ko nain Mrs Sara cu thong a tla lai lo. Cozah phaisa $12,490 a cham than lai. $2,777 dan an tat fawn. Cozah record ah ‘misual’ tiah a min an chiah lai(criminal record a ngei lai).

Mrs Sara hi cozah nih an inn ah rawlchumhtu an chiah piak ko nain a leng ah cozah phaisa hmang in rawl a ei i a cawk lengmang. Aleng rawl einak ah cozah phaisa $99,300 a hman tiah sual an puhmi a si.

A leng ah cozah phaisa in rawl cah a ngah lo timi cu Mrs Sara nih a thei bal lo, khuallian an um caan tibantuk ah an ei duhmi rawl aleng ah a cah piak tawn hna a si, Mrs Sara sualnak a ngei bak lo tiah a sihni nih a chim.

A luancia 2016 ah khan Mrs Sara inn ah rian a tuanmi pakhat nih ‘chiahru ngai in volhpamh ka tong’ a ti i taza a rak cuai hna. Riantuantu cu biaceihzung nih $47,000 an rak liamh.

Atu hi Prime Minister Netanyahu lila zong eihmuarnak a tuah tiah sual an puh i taza cuai in biaceih piak ding dirhmun ah a um, October ah a fiang te lai. BBC