Mayweather le Nasukawa i phomh ding hnatlaknak an ser ko cang

December 31 zaan ah i phomh ding ah boxing thongh thiam bik Mayweather le Japan pa MMA cakei Nasukawa hnatlaknak an tuah cang, Japan ah an i thua lai.

An i phomhnak ding ah a tawlreltu company RIZIN Fighting Federation hi MMA company pakhat a si. MMA in maw an i thua lai or boxing in dah an i thua lai timi theih fiang a si rih lo.

An i phomh tikah zeibantuk zulphung an hman lai timi cu tuhnu zarhkhat hnih ah an ceihmai lai i biachahnak an tuah lai.

“Phundang ngai in thildang tuah ka duh. Ramdang ah ka thawnnak le ka thiamnak langhter ka duh fawn. Mizapi nih an duhmi thlanti, thi le mitthli hmuhter ka duh hna,” tiah Mayweahter nih a chim.

“Ka lau pah ko nain i phomh ding ka cohlang colh ko. Ka nun chung ah a ropui bik ding i thuatnak a si lai. Kei nih tuanbia ka thlen lai, voikhat ka thongh lai i a tlu lai, rak zoh te ko u,” tiah Japan pa Tenshin Nasukawa nih a chim.

Mayweather hi boxing ah voi 50 ai thua cang, a sung bal rih lo. Japan pa hi kum 20 lawng a si rih nain voi 27 ai thua ve cang, voikhat hmanh a sung bal ve rih lo. BBC