Missile bomb he Kim Jong-un a lor than cang, Trump cozah nih North Korea tilawng an tlaih colh

North Korea nih missile bomb a test lonak a kum in a si cang nain tukar ni 5 chung ah voi 2 bak Kim Jong-un ralkap nih missile bomb an test than, zapi lungrawk ngai in a tuah hna.

Kim Jong-un cung ah President Trump a thinhung ngai. US cozah nih lung meihawl a phortu North Korea tilawng an tlaih colh ve. Indonesia ah an tlaih i US lei an ratpi cuahmah lio a si.

“North Korea nih missile bomb an test thanmi cu lung nuam lo ngai a si ko. Nuclear kong cabuai ah ceihmai an duh ko nain an i ready rih lo timi a lang. North Korea hi an cawlcangh ning felfai tein ngiat an hau,” tiah President Trump nih a chim.

Nikum June thla ah President Trump le Kim Jong-un an rak i tong i missile test ti lo ding le North Korea nuclear kaltak khawhnak ding lam kawl ding hnatlaknak an ngei.

Caan saupi cu Kim Jong-un a biakam bantuk tein North Korea nih missile an test bal ti lo, nain US he i chawnhbiaknak ah thanchonak a um lem lo caah atu missile an hun test than hi a si. BBC