Moscow airport ah minung 78 citmi vanlawng a kang i 41 bak an nunnak a liam

Russia ram Moscow in Murmansk khua ah a zuangmi vanlawng cu ai thawh hnu tlawmpal ah seh tlamtlin lonak a um i rianrang in Moscow ah an tumter than, an tumnak ah a kang i minung 41 bak an thi.

Vanlawng tlamtlin lonak a um hnu in emergency in tum an timh, voikhat nak ah an tum kho lo, voi 2nak ah an tum kho i vawlei an phak ah engine a kang colh. Caan tlawmte chung ah minung tampi an khamh manh hna.

A luatmi dihlak 37 an si, siizung ah minung 6 an um, anmah lakah pathum cu an zual ngaingai ti a si. Tam deuh cu him tein an luat khawh.

Vanlawng a tum hnu in minute 1 chung ah vanlawng riantuantu hna nih minung 37 an luatter manh hna hi a si, vanlawng riantuantu pakhat zong a nunnak a liam ve. Thangthat an tong ngai.

Zeibantuk engine tlamtlin lonak dah a um timi cu fiang tein nawlngeitu nih an chim rih lo, thil sining felfai tein kherhhlai hram an thawk cang. BBC