Pakistan Prime Minister: ‘Daihnak kan duh caah India ralkap thaizing kan thlah than lai’

An i phomhnak ah Pakistan ralkap nih vanlawng an kah i an tlaihmi India raltuk vanlawng mawngtu Abhinandan Varthaman cu daihnak kan duh caah kan thlah than lai tiah Pakistan PM nih a chim.

Vanlawng mawngtu pilot Abhinandan Varthaman cu thaizing Ningani ah kan luatter lai, India he raltuk kan duh lo, daihnak kan duh, hmurka tein i chawnh kan duh tiah Pakistan Prime Minister Imran Khan nih a chim.

Pakistan nih India vanlawng an kahthlak i pilot an tlaih khawh hi India caah limhang a zor ngai tiah ruah cio a si. Atu cu pilot kan thlah than lai an ti fawn tikah Pakistan cu thangthat an tong ngai.

India le Pakistan hi ai rem lo taktakmi innpa an si, Israel le Palestine an lo ko. Nuclear ngei veve mi an si i an i phomh taktak sual lai timi zapi nih phan ngaimi a si.

Nai ah khan Pakistan hram bunh Muslim ralhrang phu nih India ralkap 40 an thah hna, cu hnu ah India ralkap nih Pakistan ramri lonh in ralhrang an thuat ve hna.

Ramri an rak lonhmi cung ah Pakistan a thinhung i India raltuk vanlawng pakhat an kahthlak hi a si. BBC