Russia-Ukraine i rem lonak mei a alh than, ralkap an i siknak video zoh ah tihnung

Russia nih Ukraine ralkap tilawng 3 an tlaih caah tuhi ram hnih kar i rem lonak a karh ngai, an i phomh sual hnga maw timi phannak a um.

Ukraine ralkap tilawng 3 hi Crimea kam rili ah tlaih an ton hi a si. Crimea cu 2014 tiang kha Ukraine ram a si, nain 2014 ah khan Russia nih a rak chuh.

Russia rili ah phungning loin an rak luh ruang ah Ukraine ralkap tilawng 3 kan tlaih hi a si tiah Russia ralkap nih an chim.

An tlaih hna lio ah Russia ralkap tilawng nih Ukraine tilawng pakhat an pah chih, Ukraine rili ralkap 6 hliamhma an hmu, ralkap 23 tlaih an tong fawn. Tuhi Russia nih an thlah than rih hna lo.

Ukraine cozah le mipi an lungrawk ngai, Crimea pawng rili hi Russia rili a si lo, ram hnih i hrawmmi rili a si, zalawng tein kan luh khawh awk a si tiah an chim.

Russia ralkap an thil tuah hi hruh phun khat a si, a phung a si hrim lo, Ukraine ralkap timhcia tein um ding nawl kan chuah lai, Russia he kan i phomh lai tinak cu a si lo tiah Ukraine President nih a chim.

Ukraine hi Soviet Union chan ah Russia he ai kawmmi a si, nain a hnu ah cun nitlak lei ram he ai kawm deuh than. 2014 ah khan Ukraine ram Crimea a rak chuh. Cu hnu ah ram hnih kar i rem lonak fak piin a karh. BBC