Thawhthan pumh lio bak ah Sri Lanka Khrihfa bomb puah hnawh an tong, 207 an thi cang

India pawng ah a ummi Sri Lanka ram ah ralhrang phu nih Khrihfa thawhthan an hman lio bomb an puah hnawh hna, minung 207 bak an nunnak a liam.

Timh ciammam tein bomb an puah hnawhmi a si. Biakinn pathum ah bomb an puah, hotel minthang zong ah an puah rih. A thimi lakah ramdangmi zong an tam ngai. Minung 450 bak hliamhma an hmu.

Ralhrang phu hi zeibantuk phu dah an si timi theih a si rih lo. Nain, Muslim ralhrang nih Khrihfa biakinn bomb an puah hnawh te lai timi ralrin peknak cu kan hnu zarh ah khan police nih warning an thanh ciami a si.

Sri Lanka cu Buddhist tam biknak ram a si. Buddist nih Muslim le Khrihfa biakinn hrawh piak a tam ngai tawn. Nain, Muslim le Khrihfa kar i rem lonak a um timi cu theih bal a si lo.

An ram ah a thawng ngaimi Tamil hriamtlai phu an rak um bal, nain 2009 ah cozah ralkap nih an thuat hna i an ci an hmih hna. Minung tam taktak an rak thi.

Muslim maw an si lai or Buddhist le Tamil hriamtlai phu dah timi cu police nih kherhhlainak an tuah hnu lawng ah an langhter khawh lai.

Atu hi Sri Lanka rammi cu khuaci an mui ko. Zaan ah a leng chuah lo ding mizapi nawl an pek hna. Social media a simi Facebook le a dangdang zong an phih chung. BBC

cainu

cainu8

cainu7

cainu6

cainu4

cainu3

cainu2

cainu1