UK Prime Minister Theresa May cu a tah buin a rian ai phuak, upat a tlak tuk an ti cio

UK Prime Minister Theresa May cu a rian tlam a tlin khawh deuh lo caah prime minister sinak in ai din ko cang, ai dinhnak kong a phuan lio ah mitthli he a tap chih.

UK mipi nih European Union(EU) chuah tak ding biachahnak an tuah hnu ah Theresa May hi prime minister tuan ai thawkmi a si. EU hruaitu hna he hnatlaknak tampi a ser, a sermi hnatlaknak cu UK parliament ah MP hna nih an fehter duh bal lo.

Theresa May a rian ngan bik tiah an ruahmi cu EU in UK chuahpi khawh ding hi a si, nain kum 3 chung ah tlam a tlinh khawh rih lo caah hruaitu si awk kai tlak ti lo, UK nih hruaitu thar a herh a ti i a rian ai din hi a si.

Ka si khawh chung in UK hi EU in chuahpi khawh kai zuam, voi 3 tiang UK parliament ah hnatlaknak ka sermi an fehter kho lo, kan ram nih hruaitu prime minister thar a herh cang timi kai fiang, cucaah UK prime minister sinak in kai din cang lai tiah Theresa May nih a chim.

June 7 ah ai din taktak te lai. Ai din hnu ah cozah sertu Conservative party nih hruaitu thar an thim lai i cu hruaitu cu UK prime minister thar a si lai.

Conservative party hruaitu(UK PM) thimnak ah min a pemi candidate 4 an si cang, UK ramdang vuanci a tuan balmi Boris Johnson zong thimnak luh ai tim ve. Anih hi tulio an zumh ngaimi a si.

UK tuanbia ah Theresa May hi 2nak nu prime minister a si. Theresa May hi a lung thawng i tei a ma, a nusal bak tiah an ruahmi a si. BBC